မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်း စုကြည်ရဲ့ နိုဘယ်လ်ဆု လက်ခံပွဲ အပါအ၀င် ဥရောပ ခရီးစဉ်ကို နိုင်ငံပိုင် သတင်း မီဒီယာတွေက လုံးဝ မဖေါ်ပြခဲ့ပါဘူး။ အဲသလို မဖေါ်ပြတဲ့ အကြောင်းက ဒေါ်အောင်ဆန်း စုကြည်ရဲ့ ခရီးစဉ်ဟာ ပုဂ္ဂိုလ်ရေး ခရီးစဉ် သက်သက်ဖြစ်နေတဲ့ အတွက်ကြောင့် ထုတ်လွှင့် ဖေါ်ပြမှု မရှိတာ ဖြစ်ကြောင်း အစိုးရပြန်ကြားရေး ၀န်ကြီးဌာန အမှုဆောင် ညွန်ကြားရေးမှုးချုပ် ဦးရဲထွဋ် က ပြောဆိုလိုက် ပါတယ်။
ဥရောပကို ရောက်ရှိနေတဲ့ ဦးရဲထွဋ် ဟာ သူရဲ့ခရီးစဉ် အတွင်း ဇွန်လ (၁၉) ရက်နေ့ ဒိန်းမိတ်နိုင်ငံ ကိုပင်ဟေဂင် မြို့တော်မှာကျင်းပတဲ့
မြန်မာသတင်းမီဒီယာနဲ့ ပတ်သက်တဲ့ အလုပ်ရုံ ဆွေးနွေးပွဲမှာ အဲသလို ပြောဆိုခဲ့တာပါ။
အဲဒီဆွေးနွေးပွဲမှာ ဒေါ်အောင်ဆန်းစုကြည်ရဲ့ နိုဘယ်လ်ဆု အခမ်းအနား သတင်းနဲ့တကွ တခြားဥရောပ ခရီးစဉ် တွေကို ဘာကြောင့် အစိုးရ သတင်းမီဒီယာတွေက မဖေါ်ပြတာပါလဲ ဆိုတဲ့မေးခွန်းနဲ့ ပတ်သက်လို့ ဦးရဲထွဋ် ပြန်လည် ဖြေကြားခဲ့ပုံကို အလုပ်ရုံ ဆွေးနွေးပွဲ တက်ရောက်ခဲ့တဲ့ ဒိန်းမတ် အခြေစိုက် ဘားမားကမ်ပိန်း အဖွဲ့က မခင်မိုးမိုးက ပြောပြပါတယ်။
"သူဖြေတာမှာ အဲဒီ USDP က ကိုယ်စားလှယ်နဲ့ NLD က ကိုယ်စားလှယ်တယောက်နဲ့ အတူတူပါပဲပေါ့။ သာမန် ကိုယ်စားလှယ် တယောက်ဖြစ်လို့ နိုင်ငံပိုင် သတင်းမီဒီယာမှာ မျက်နှာလိုက်ပြီးတော့ ဖော်မပြနိုင်ဘူးလို့ သုံးနှုန်း ပြောဆိုပါတယ်။"
ဒါ့အပြင် အစိုးရ မီဒီယာအနေနဲ့ ပါတီတွေရဲ့သတင်းတွေကို ဖေါ်ပြရာမှာ စည်းကမ်း သတ်မှတ်ထားပြီး ပုဂ္ဂိုလ်ရေး ခရီးစဉ်နဲ့ သက်ဆိုင်ရာ ပါတီတွေရဲ့လှုပ်ရှားမှု သက်သက်ဆိုရင် ဖေါ်ပြတာမျိုး မရှိဘူးလို့ ဦးရဲထွဋ် က ပြောဆို ကြောင်း၊ တကယ်လို့သာ ဒေါ်အောင်ဆန်းစုကြည်ဟာ လွှတ်တော် ကိုယ်စားပြု ပြီး သွားမယ်ဆိုရင်တော့ သတင်း
အဖြစ်ဖေါ်ပြမှာ ဖြစ်တယ်လို့ ဆိုကြောင်း လည်း မခင်မိုးမိုးက ပြောပါတယ်။
ဒီကိစ္စ နဲ့ပတ်သက်လို့ ပြည်သူ့ခေတ် ဂျာနယ် အတိုင်ပင်ခံ အယ်ဒီတာ ဆရာမောင်ဝံသ ကတော့ -
"လူပုဂ္ဂိုလ် တဦးချင်းရဲ့ ခရီးမို့လို့ နိုင်ငံပိုင် သတင်းစာက ဖော်မပြနိုင်တာ
ဆိုရင်တော့ သတင်း အမြင်အရ ဆိုရင်တော့ တမျိုး ဖြစ်မယ်လေ။ ဒါက သတင်းထူးတခုပေါ့လေ။ ကိုယ့်တိုင်းပြည် အတွက် အရေးကြီးတဲ့သတင်း၊ ကိုယ့်တိုင်းပြည် အတွက် ဖော်ပြသင့်တဲ့ သတင်း ဟုတ်လား မဟုတ်လား
ဆိုတာကတော့ ဒါကိုတော့ ထပ်ပြီး မေးခွန်း ထုတ်စရာ ရှိတာပေါ့လေ။ ဒီသတင်းကို ဘလက်အောက် လုပ်တယ် မှောင်ချတယ်တော့ မဟုတ်ဘူးပေါ့လေ။ ဒီပြည်တွင်း ပုဂ္ဂလိက ဂျာနယ်တွေမှာ ကတော့ အတော်လေးကို အကျယ်တ၀င့် ထဲ့ကြတယ်ပေါ့။"
CNN/ BBC/ Al-Jazeera အပါအ၀င် ကမ္ဘာ့သတင်း မီဒီယာကြီးတွေ
ကတော့ ဒေါ်အောင်ဆန်းစုကြည်ရဲ့ ဥရောပ (၅) နိုင်ငံခရီးစဉ်အတွင်း လှုပ်ရှားမှုတွေကို အဆက်မပြတ် ထုတ်လွှင့် ပြသနေပါတယ်။
RFA Burmese
No comments:
Post a Comment