Friday, March 23, 2012

ခြံပိုင်ရှင်အချို့ လျော်ကြေးငွေများ ယခုအချိန်ထိ မရရှိသေး

Ever November | 3/23/2012 01:30:00 PM | Best Blogger Tips

တနင်္သာရီတိုင်း ဒေသကြီး ထားဝယ်ခရိုင် ရေဖြူမြို့နယ် နဘုလယ်ဒေသ၌ အကောင်အထည်ဖော် တည်ဆောက်လျက်ရှိသော ထားဝယ် ရေနက်ဆိပ်ကမ်းနှင့် အထူးစီးပွားရေး စီမံကိန်း စတင်ချိန်၌ ဒေသခံများအား အသိပေးခြင်းမရှိဘဲ လမ်းကြောင်း ဖောက်လုပ်ခြင်းနှင့် အဆောက်အအုံ ဆောက်လုပ်ခဲ့ခြင်း တို့အတွက် အဆိုပါ မြေများကို ပိုင်ဆိုင်သော ဒေသခံများအား နေပြည်တော်မှ တာဝန်ရှိသူများ လာရောက်၍ နစ်နာကြေး ပေးအပ်ခဲ့ပြီး စီမံကိန်းတာဝန်ရှိသူများအား ဒေသခံများကို အသိမပေးဘဲ ခြံမြေများကို ရှင်းလင်းခြင်း မပြုရန် သတိပေးခဲ့ကြောင်း သိရသည်။
ထိုသို့ နစ်နာကြေး ပေးအပ်ခဲ့သော်လည်း ယခုအချိန်ထိ နစ်နာကြေး ရရှိခြင်းမရှိသူများ ကျန်ရှိနေသေးပြီး အမြန်ဆုံးပေးအပ်ရန် ဒေသခံခြံပိုင်ရှင်များက တောင်းဆိုမှုများ ရှိနေကြောင်း သိရသည်။
“တခြားသူတွေပြောတာက အခု တစ်ဧကကို သိန်း၁၀၀နီးပါး လောက်နဲ့ သူတို့ (ရေနက်ဆိပ်ကမ်း တာဝန်ရှိသူများ)က ဘ၀ါဘက်မှာ လျော်ကြေးပေးခဲ့တယ်လို့ သိရတယ်။ ဘ၀ါဘက်မှာ ဒေသခံတွေထဲက မြေ၀ယ်ဖို့ ပိုက်ဆံရှိပေမယ့် မြေမရှိတော့ဘူးလို့ သိရတယ်။ အဒေါ့်ခြံက ကမ်းခြေနံဘေးမှာရှိပြီး သူတို့လမ်းကြောင်း ဖောက်ရာမှာ ပါသွားတာ။ ဘေးခြံက ဦးသောင်းဝင်းက သူတို့ပေးတဲ့ လျော်ကြေးကို မကျေနပ်လို့ မယူဘဲနေတာ ကိုသူတို့က အဒေါ့်ကိုပါ မပေးတော့ဘူး။ သူတို့နဲ့ သဘောတူ ထားတာက သီဟိုဠ်တစ်ပင်ကို ကျပ် ၄၀၀၀၀နှုန်း နဲ့ အပင် ၄၀ အတွက် ၁၆ သိန်းပါ။ ဒါကို ၁၀ သိန်းပဲပေးနိုင်မယ်ဆိုပြီး ဈေးလာဆစ်နေတာ မနည်းတော့ဘူး။ ကြာလာတော့ အဒေါ်လည်း ပြောနေညှိနေရင် ကြာမှာစိုးလို့ ဈေးဆစ်နေတဲ့ ၁၀ သိန်းနဲ့ပဲ သဘောတူ လက်မှတ်ထိုး လိုက်တော့တယ်။ အဲဒီ လို သဘောတူ လက်မှတ်ထိုး ထားတာကိုတောင် သူတို့ကလျော်ကြေး မပေးဘူး။ သွားပြီးမေးတော့ အဒေါ့် ခြံနံဘေးက ဦးသောင်းဝင်းက လျော်ကြေးကို သဘောမတူနိုင်ဘူးလို့ဆို ပြီး လာပြောသွားလို့ အဒေါ့်ကိုပါ မပေးနိုင်တော့ဘူးတဲ့။ ဘာဆိုင်လို့လဲ။ သူတို့မြေတွေ လမ်းဖောက်ထားတာက ပြီးသွားပြီ။ လက်မှတ်ထိုးထား တာကလည်း မနှစ်က တစ်လပိုင်းက တည်းကပါ။ အခုဆိုတစ်နှစ်ကျော် နေပြီ။ ဦးသောင်းဝင်းက သူတို့ပေးတဲ့ဈေးကို သဘောမတူလို့ အဒေါ့်ကို လည်းမပေးဘူးဆိုရင် သူတို့နဲ့အဒေါ် သဘောတူထားတဲ့နှုန်းအတိုင်း မယူနိုင်တော့ဘူး။ အဒေါ်နဲ့အတူ လျော်ကြေးမရသေးတဲ့ ခြံပိုင်ရှင် ခုနစ်ယောက် ကျန်သေးတယ်။ လမ်းဖောက်ရာမှာ ပါသွားတာက တကယ်ရှိတာ သီဟိုဠ်အပင် ၅၀ပါ။ ဘာလို့သီဟိုဠ် ၁၀ ပင် စာရင်းဖျောက်လိုက်လဲ မေးတော့ မယင်းကြီးရွာ ဥက္ကဋ္ဌက အပင်များနေလို့တဲ့။ ဒါဆိုလည်းထားတော့၊ သူတို့စာရင်းပြတဲ့ အပင် ၄၀ တောင် ဒီနေ့အထိ လျော်ကြေး မရသေးဘူး” ဟု မယင်းကြီးရွာမှ လမ်းကြောင်း ဖောက်လုပ်မှုအတွက် လျော်ကြေးငွေ မရရှိသေးသူ ဒေါ်မိစုငယ်က ပြောကြားသည်။
ထားဝယ် အထူးစီးပွားရေးဇုန် အထောက်အကူပြု အဖွဲ့မှ ထုတ်ပြန်ထားချက်အရ စီမံကိန်းဧရိယာအတွင်း ရှိ ထိန်ကြီး၊ လဲရှောင်၊ မရဒတ်၊ မူဒူး၊ မယင်းကြီး၊ ညောင်ပင်ဆိပ်နှင့်ရေ ကာတာတည်ဆောက်မည့်ကလုံးထာ ကျေးရွာများရှိ ဒေသခံများ၏ လူနေ အိမ်ခြေများ၊ အဆောက်အအုံများ၊ လယ်ယာဥယျာဉ်ခြံမြေများ၊ သီးပင် စားပင်များနှင့် စိုက်ခင်းများကို ပြောင်းရွှေ့ရသူများအတွက် မူလအဆင့်အတန်းထက် မနိမ့်ကျစေဘဲ ယင်းတို့ ၏ အခြေခံလိုအပ်ချက်များကို ပြည့်စုံအောင် ရင်းနှီးမြှုပ်နှံသူဘက်က ဆောင်ရွက်ပေးရမည် ဖြစ်ကြောင်းနှင့် ရင်းနှီးမြှုပ်နှံမှု ဆောင်ရွက်မည့် ကုမ္ပဏီကို မြေလွှဲပြောင်းပေးရန်အတွက် ဇုန်အလိုက် လျော်ကြေးကိစ္စများပြီး ပြတ်မှ မြေကိုလုပ်ငန်း ဆောင်ရွက်မည့်အပိုင်း အလိုက် (Partcially) လွှဲပြောင်းပေးအပ်သွားမည် ဖြစ်ကြောင်း သိရသည်။ ထို့အပြင် စီမံကိန်းစတင်မည့်အချိန် အစိုးရလက်ထက်က လမ်းညွှန်ထားချက်အရ နှစ်ရှည်သီးနှံ ပေါ်တွင်သာ ၀င်ငွေမှီခိုရပ်တည်နေရသော မိသားစုဖြစ်ပါက ယင်းနှစ်ရှည်သီးနှံအတိုင်း နေရာသစ်တွင် စိုက်ပျိုးစေ ပြီး ၀င်ငွေရရှိချိန်မှသာ ထိုဝင်ငွေဖြင့် ဆက်လက် ရပ်တည်နိုင်ရေး၊ ပြောင်း ရွှေ့ပေးရန် အချိန်စော၍ပြောင်းရွှေ့ ပေးစေလိုပါက ထိုနှစ်ရှည်ဝင်ငွေဖြင့် မိသားစုရပ်တည်နိုင်သည့် အခြေအနေအတိုင်း လစဉ်၊ နှစ်စဉ်ထောက်ပံ့ ကြေးပေး၍ အာမခံရန်လိုကြောင်း သိရသည်။
စီမံကိန်းဧရိယာအဖြစ် သတ်မှတ်ထားသည့်၂၀၄ဒသမ၅၀စတုရန်း ကီလိုမီတာ ၅၀၅၃၅ဒသမ၀၂ဧက အတွင်းရှိ ဒေသခံများ၏ စိုက်ပျိုးမြေများဖြစ်သော လယ်၊ ဥယျာဉ်နှင့် ဓနိ စုစုပေါင်း ၃၅၈၄၇ဧကအတွက် ထားဝယ် အထူးစီးပွားရေးဇုန် အထောက်အကူ အဖွဲ့(ယာယီ)မှနေ၍ စစ်တမ်း ကောက်ယူခြင်းနှင့် လျော်ကြေးငွေ ပေးအပ်ခြင်းများကို ယခုနှစ်အစပိုင်း မှစ၍ လုပ်ဆောင်နေပြီ ဖြစ်ကြောင်း သိရသည်။   
EMG

No comments:

England - Premier League

Italy - Serie A

Spain - Primera Division

Germany - Bundesliga

France - Ligue 1